عن الإيمان

-لا تيأسي

-انا مش يأسانة

-لماذا ليس لصوت الشباب والصبايا من بلدك صدى ضد الاضطهاد؟

-هنالك قمع ودولة بوليسية واعتقالات سياسية وهيك

-اعتقالات سياسية؟ قصدك السلطة تعتقل معارضيها؟ لا! يا للعار!

-اه طبعا

الخلفية: حانة لطيفة قريبة من سكن الطلاب

الحدث: احتفال عيد ميلاد صديقة

الأشخاص: فلسطينية تعاني من رتابة صراع الهوية ,كوردي من كوردستان يجيد اللغة العربية الفصيحة, وأشخاص آخرون

المشروب: ginger beer و بيرة

المزاج: ما بين اللامبالاة والسخط

-بنظرك, هل تعتقدين أن الوضع سوف يتحسن؟

-انا طلعت من البلد

-ناوية ترجعي؟

-لأ
-لماذا؟
-اظن اذا سمعت اي حدا من هناك يحكيلي "مش باقي منك الا جلدة وعظم" ممكن افجّر حا-, قصدي, لأ, لا مش راجعة

-ولكن..الوضع السياسي بشكل عام..هل توجد ضغوطات من جهات معينة ضد السلطة؟

-لأ

-جد!

-اه. شوف يا زلمة, انا برضه بحب أسمع وأحكي عن أخبار لطيفة وراقية..توخدش عني فكرة غلط وتصورنيش بإنسانة محبطة مكتئبة ملتعن سماي وجاية ابعص, يعني أنكّد على انطباعات وارآء مناصري القضية الفلسطينية, مع انه ما بهمني رأيك كثير عشان لسه قبل شوي تعرفنا على بعض

-أبداً…أقولك, عندما زرت الضفة رأيت كيف كان رجال السلطة يعيشون في قصورهم ومبانيهم الفخمة.. ورأيت كيف كان الشعب يعاني ليبحث عن لقمة العيش. ليس عندي أي احترام للسلطة

-طيب على مهلك شوي, مش الكل بيشحد بالشارع. المسألة انه فش حياة تعيشها هناك خاصة -بين قوسين-لصبية متمردة

-هل يوجد حراك شبابي يطالب بإستقالة السلطة؟

-بكل جدية؟ لأ

أخذ رشفة من كأسه ثم ابتسم وقال: لا تيأسي..احنا مسلمين. عندما يأتي المهدي لا بد من الأوضاع أن تتحسن في فلسطين

-عفوا؟

-هكذا مكتوب في ديننا. الصراع على الأرض المقدسة سوف تستمر حتى مجيء المهدي

سكتت. فكرت اسأله اذا كان يعاني من نوع من انواع الانفصام ولكن دخلة الكعكة والعجقة التي دارت حولها صرف انتباهنا إلى صديقتنا المشتركة

بعد قطعتي الثالثة من الكعكة, تذمرت بصوت عالٍ:

-بالمقابل لازم نحط رجل على رجل ونستنى حضرته ليجي عندنا؟

فأجاب: نعم

-شو بتحكي! 

-هذا هو إيماني

-إيماني انه اظن بكفيك شرب اذا بدك تخوض محادثة جدية معي

-انا جدي!

-بتقدرش تتوقع من شعب محتل منتاك عرضه كلهم يآمنوا بإنه مصايبهم رح تنتهي لما المهدي يتشرف! وانه اصلا في مهدي! ومجبورين نوكل خرا بكل برود وفي شخص واحد رح يخلصنا من كل همومنا!

-طبعا لا..ولكن هذه هي النقطة المركزية

-شو هي؟

مرّت ومضة من البرق على وجهه وانشقت الغيوم لتكشف البدر ثم قال:

ان يكون عندك الشجاعة لتؤمن بشيء كبير وخفي

ثم خرج ليدخن

الخلفية: محادثة عن فتنة شعر الجسم عند المرأة تسيطر على حفلة لطيفة 

الشخصيات: الفتاة المستنيرة, الصديقة, وأشخاص آخرون

المشروب: ginger beer

المزاج: سريالية

-كيفك؟ عم تحكوا كثير انتِ وياه

-ولك لقى الحل للقضية!

-شو هي؟

-المهدي!

-طيب حبيبتي ديري بالك, لأنه بكره العرب

-لأ, بكره السلطة. بحب فلسطين...بتعرفي انه زار فلسطين؟

-اه بعرف..أجى مع شركته على إسرائيل

-بس المهدي..

ثم صفنّا ليوم الدين